Content on this page requires a newer version of Adobe Flash Player.

Get Adobe Flash player

SUBMISAUN LUTA HAMUTUK 23 January 2013

“Proposta Projetu Lei No 2/III/ (Ia) Orsamentu Jeral Estadu (OJE) 2013”

 

Sua Excelensia:

  • Presidente Komisaun D – Komisaun Ekonomia no Dezenvolvimentu
  • Distintos Membro Komisaun D Parlamento Nasional
  • Deputado/as Parlamento Nasional RDTL

 

 

SITUASAUN MAKRO-EKONOMIA IHA TIMOR-LESTE 2013

 

1. Kresimentu ekonomiku

Kresimentu ekonomiku hanesan komparasaun real aktividades ekonomiku (Gross Domestic Product/ GDP) husi tinan ida ne’e ho tinan kotuk, no variabel husi GDP  mak;  konsumpsaun rai laran, investimentu, despeza governu no exportasaun ne’ebe hakuran importasaun. Bazeia ba variabel hirak ne’e, ami konklui katak kresimentu ekonomia ne’ebe sa’e maka’as tanba despeza publiku/ governu ne’ebe bo’ot ba beibeik.  Iha kontextu Timor-Leste, konsumpsaun no despeza korrente sae maka’as husi tinan 2006 to’o 2012 total hamutuk 57.4%, liu $3,244 mil milhões de dólar hodi gasta ba iha aumenta salariu, bens e servisu, kapital minor  (sosa kareta, motor, gerador, etc.) no transferensias kompara ho investimentu no exportasaun (despeza kapital, infrastrutura).

 

Iha OJE 2012 no 2013, despeza korrente governu atinzi 50%, hanesan mos despeza kapital to’o 50%, maibe iha tempu mak hanesan laiha ekilibriu ho exportasaun no investimentu iha rai laran. Hodi nune’e, ita bele hateten despeza governu sai fator dominante iha kresimentu ekonomia Timor-Leste.

 

Hare’e husi variabel sira ne’e, no kresimentu ekonomika sae  duas digitu maibe fundasaun ekonomia sei fraku teb-tebes no la sustentável. Nune’e bainhira estadu laiha ona osan (Ezemplo: osan iha Fundo Petróleo hotu ona), entaun sei akontese krize fiskal no ekonomia ne’ebe bo’ot teb-tebes, tanba kontribusaun impostu husi produsaun rai laran ne’ebe sei ki’ik liu. Ami hakarak dehan katak tinan-tinan, impostu husi rai laran so bele kontribui to’o deit 8-10%, hanesan OJE 2013 reseitas husi rai laran (domestiku) kontribui deit 8%.  Impostu ne’e rasik minimu seidauk bele atu finansia despeza salariu e vensimentu.

 Tabela 1: Komparasaun Kresimentu Ekonimiku TL ho Nasaun seluk.

Pais

Atual

Projecsaun

 

2009

2010

2011

2012

2013

Xina

9.2%

10.4%

9.2%

7.8%

8.2%

Australia

1.4%

2.5%

2.1%

3.3%

3.0%

Singapura

-1.0%

14.8%

4.9%

2.1%

2.9%

ASEAN-5

1.7%

7.0%

4.5%

5.4%

5.8%

Indonesia

4.6%

6.2%

6.5%

6.0%

6.3%

Vietnam

5.3%

6.8%

5.9%

5.1%

5.9%

Filipina

1.1%

7.6%

3.9%

4.8%

4.8%

Talaândia

-2.3%

7.8%

0.1%

5.6%

6.0%

Malázia

-1.5%

7.2%

5.1%

4.4%

4.7%

Timor-Leste

12.8%

9.5%

10.8%**

10.6%***

10.45***

Fontes: livru númeru 1, p.14 Proposta OJE 2013.

 

Bainhira halo komparasaun ho nasaun seluk iha rejiaun Azia Pasifiku no mundu rai klaran; Timor-Leste sai uniku nasaun ne’ebe mak nia kresimentu ekonomiku a’as to’o 10.4% iha 2013, maibe la-signifika moris povu no ekonomia Timor-Leste diak liu bainhira kompara ho nasaun sira seluk, tanba nasaun seluk iha Azia Pasifiku ho kresimentu ne’ebe ki’ik maibe fundamentu ekonomia diak liu kompara ho Timor-Leste. Tuir lolos Timor-Leste bele orgulho ho progressu ida ne’e bainhira aktividades ekonomia la’o ho diak. Maibe Luta Hamutuk hare’e katak, kresimentu ekonomiku seidauk refleta kondisaun real  povu ne’ebe nasaun ne’e infrenta dadaun, aktividades ekonomia hotu-hotu tabele ba orsamentu estadu.

 

Maibe ita tenki kuidadu, tanba bainhira laiha kontrollu ho produsaun rai laran hodi redus importasaun bele prejudika inflasaun ne’ebe mak sae maka’as. Ezemplu ida, kresimentu ekonomiku iha 2012 (10.6%), maibe inflasaun atinzi 11.7%. Hare’e ba dadus ne’e tuir lolos kresimentu ekonomia presiza mos konta ninia inflasaun ne’ebe akontese iha rai laran. Kuandu situasaun ekonomia iha rai laran hanesan ne’e, ita sei orgullu gava-an ho kresimentu ekonomiku bo’ot tebes?

 

Fenomena kresimentu ekonomiku ne’e hanesan ema ekonomista sira bolu “catch-up effect,” katak nasaun sira ne’ebe komesa husi kiak ninia kresimentu sei sae maka’as liu kompara ho nasaun sira ne’ebe riku ona. Iha kondisaun ne’ebe kiak, osan hira deit, liu-liu orsamentu estadu ne’ebe bo’ot hanesan iha Timor-Leste, ho gasta no gasta deit otomatikamente sei hasa’e kresimentu ekonomiku. Hodi hateten termus ida ne’ebe sinismu oituan katak, governu tuir lolos la-persiza halo buat ida, gasta deit osan no halo kompras deit mos kresimentu ekonomiku sei akontese.

 

Luta Hamutuk preokupa tebes, kresimentu ekonomia tuir indikador makro-ekonomia, tuir lolos tenke uza sasukat mikro-ekonomia hodi sukat rezultadu husi aktividade ekonomia iha rai laran. Resultadu kresimentu ekonomiku ne’ebe as, la signifika fo impaktu nebe diak ba moris povu iha nasaun ida bainhira setor sira ne’ebe hamoris aktividade ekonomia seidauk hetan atensaun no la-dezenvolve ho diak. Por ezemplu; produsaun rai laran sei tun ba beibeik, setor manufaktur seidauk dezenvolve, ekonomia ki’ik-mediu laiha atensaun (inklui kooperativas); nomos iha tempu mak hanesan dependensia sei maka’as ba importasaun, jovens sira difisil tebes atu hetan servisu, sasan nesidades baziku folin karun ba bei-beik, distribuisaun osan mos iha ema oituan nia liman deit.

 

2. Kampu servisu

Kampu servisu ne’ebe falta mos iha relasaun ho estrutura GDP ne’ebe iha Timor Leste, laiha investimentu real ne’ebe loke kampu trabalho. Maske durante tinan 7 (2006-2012) despeza kapital hamutuk US$2,382 mil milhões (42%) la-konsege absorve trabalhadores tanba kuaze servisu ne’ebe halo uza ekipamentu pezadu, forsa ema nian minimu teb-tebes nune’e ema mak atu servisu mos oituan deit. Dezafiu bo’ot liu mak infrastrutura ne’ebe mak ita iha seidauk bele atu dada investor sira hodi investe.

 

Ami propoin ba Parlamentu Nasional atu husu Governu hodi aprezenta dadus foun ba kondisaun dezenpregu iha rai laran, atraves minimu dadus kada tinan-tinan hodi sukat kondisaun real dezenpregu iha ita-nia rai, do que uza deit dadus Labour Force Survey 2010 mak lolos ladun kondis ona ho situasaun tinan 3 ikus ne’e. Ezemplu ida, governu aprezenta katak kuaze 9,000 jovens mak dezenpregadu, signifika katak kuaze jovens hamutuk 3% mak tuir lolos laiha servisu. Kuandu uza dadus ne’e, mais fasil atu rezolve dezenpregu iha Timor-Leste ho kondisaun OJE ne’ebe liu billiaun $1 dólar husi kedan 2011, 2012 no 2013.

 

3. Inflasaun

Taxa inflasaun iha relasaun mos ho montante osan nebe sirkula iha rai laran. Iha kontextu Timor-Leste ho inflasaun 11.7% iha 2012, ida ne’e hanesan heransa husi tempu UNO nian kedan, bainhira osan tama barak iha rai laran maibe iha tempu ne’eba  laiha institusaun moneter nasional ne’ebe halo kontrola ba kresimentu osan/ - money growth iha rai laran. Instituisaun Monetária Finansiru/ IMF mak asume kargu ne’e hodi introdus US Dollar atu netralisa inflasaun. 

 

Tanba-ne’e, Banco Central hanesan institusaun ida ne’e iha responsibilidade atu maneja money growth, sirkulasaun osan iha rai laran ka politika moneter atu minimiza inflasaun. Valor osan sei tun bainhira merkado bele absorve nia kliente (se povu iha ona kapasidade atu kompras) iha rai laran. Ita hotu hatene katak povu Timor-Leste nia kapasidade kompras sei ki’ik liu.  Luta Hamutuk hakarak hateten katak,  presiza mos politika fiskal ida ne’ebe bele resolve problema inflasaun ne’ebe projekta iha 2013 atu to’o 7.6%, hanesan hadia infrastrutura ba distribusaun alimentar, presiza mos iha politika moneter hodi halo balansu ba politika fiskal, maske ita seidauk iha moeda rasik maibe governu liu husi Banco Central bele kria framework ida ba osan funan iha banco nune bele kria ambiente diak ba komunidade no emprezariu sira no hamenus grupu balun ne’ebe kaer osan barak no gosta halo gastus ba konsumu deit.

 

RESEITAS OJE 2013

Proposta Orsamentu Jeral Estadu (OJE) 2013 hato’o ona husi V Governu Konstitusional ba Parlamentu Nasional iha dia 18 Dezembru 2012, proposta ne’e ho montante reseitas estimadu hamutuk $1,797.5 mil milhões de dólar americano

 

No

Reseitas

Sub-total (US$miliaun)

Pursentu/ % 

1

Fundo Petroliferu (RSE 3%)

787.0

43.8%

2

Exesu/ Foti liu RSE

410.8

22.9%

3

Reseitas domestika

146.3

8.1%

4

Saldu Governu/ Roll-over

409.8

22.8%

5

Emprestimus

43.6

2.4%

 

Totalidade (US$miliaun)

1,797.5

100% 

Tuir tabela iha leten, reseitas domestika (impostus no ajensia outonomus) kontribui deit 8.1% husi total despeza estadu nian. Signifika katak, Timor-Leste seidauk bele expeta barak ba iha reseitas domestika hodi finansia despeza estadu tomak, inklui mos seidauk bele finansia kategoria salariu no vensimentu ne’ebe mak presiza osan iha 2013 hamutuk $160.3 milhões (8.92%).

 

Projeksaun reseitas OJE 2013, ita bele hare’e kapasidade finanseiru Timor-Leste nian, liu-liu reseitas naun-petroliferu ne’ebe mak seidauk bele responde nesesidade estadu nian. Iha 2008, bainhira halo alterasaun ba Lei Tributaria, governu iha komprimisiu katak ho impostu ne’ebe ki’ik atu estimula investimentu husi rai-liur no hodi hatun folin sasan iha rai laran. Kuandu komprimisiu ne’e atinzi, impostu/ reseitas domestika bele aumenta no bele ona taka lakuna orsamentu estado nian balun. Maibe realidade hatudu mai ita oin seluk tiha, tanba depois de alterasaun Lei Tributaria, setor investimentu husi rai liur seidauk hatudu sira ninia interese nune’e mos iha rai laran, maibe iha tempu mak hanesan setor privadu sira hein deit mak orsamentu estadu, sai kliente pasivu ba governu no prejudika reseitas domestika ne’e rasik.

 

Hare’e husi reseitas ne’ebe mai husi aktividades ekonomia iha rai laran, setor publiku no  ajensia autonomus tinan-tinan governu kolekta deit reseitas entre 5%-10% deit, nune’e iha indikasaun forte Timor-Leste sempre iha defisit orsamentu to’o 90%-95%, inklui iha tinan fiskal 2013 hatudu defisit orsamentu 91%, ne’e inklui ona reseitas ne’ebe mai husi imprestimus/ deve hamutuk US$43,6 milhões. Defisit ne’ebe akontese iha OJE kada tinan hatudu katak, laiha balansu ne’ebe signifikadu husi reseitas domestiku, no sei dependensia maka’as ba iha fundu petroliferu ne’ebe lolos fundo ne’e tenki sai hanesan motor aranka deit.

 

Tuir monitoramentu ne’ebe Luta Hamutuk hala’o ba rendimentu domestika durante ne’e hatudu katak, iha instituisaun publiku barak mak laiha reseitas ba estadu maske tinan-tinan governu sempre aloka osan/ halo subsidiu. Por ezemplo laiha reseitas husi RTTL, Instituto Jestaun Ekipamentu (komesa tinan hat ikus tinan 2007-2010 laiha reseitas), Inpeksaun importa kareta no exportasaun café no produtu agrikula balun. Relasiona ho reseitas domestika (reseitas fiskais) ne’e, Luta Hamutuk kestiona politika exportasaun ne’ebe jere husi Ministeriu Komersiu Industria, tamba durante ne’e estadu Timor-Leste seidauk iha impostu ba exportasaun maske ita hotu hatene iha potensia produtu lokal barak mak halo ona exportasaun no lolos bele hetan impostu hodi kontribui ba OJE. Nune’e mos, ami deskobre katak impostu barak mai husi importasaun ne’ebe kada tinan hetan aumentu, hatudu katak osan barak mak sempre semo ba rai liur.

DESPEZA OJE 2013

No

Kategoria

Total Alokasaun (US$miliaun)

Pursentu/ %

1

Salariu e Vensimentu

                    160.3

8.92%

2

Bens e Servisu

                    461.7

25.68%

3

Kapital Minor

                      47.2

2.63%

4

Kapital Dezenvolvimentu

                    891.9

49.62%

5

Transferensia Publika

                    236.5

13.16%

 

Totalidade despeza (US$miliaun)

                 1,797.5

100%

 

Tuir governu katak, despeza estadu 2013 tun 0.5% kompara ho OJE 2012, ho objetivu atu kontribui ba sustentabilidade fiskal no kontrolla inflasaun. Governu hamenus despeza infrastruktura to’o 10.8% maibe iha tempu mak hanesan governu hasae despeza rekurenti to’o 17%.

 

Maske despeza total menus, maibe ami indika proposta OJE 2013 iha aumentu 17% iha despeza rekurenti, despeza ne’e nu’udar gastus ne’ebe ba iha konsumu makina estadu nian. Luta Hamutuk husu atu hatu’ur hatudu politika fiskal ne’ebe mak atu promove efisiensia despeza estadu, ho dalan ida ne’e mak bele kontribui ba iha sustentabilidade fiskal.

 

EXEKUSAUN OJE 201

Exekusaun OJE 2012, ne’ebe publika husi Portal Transparansia, hatudu dezenpenhu exekusaun ne’ebe ki’ik, husi totalidade alokasaun OJE 2012 hamutuk $1,806.5 mil milhões, governu halo exekusaun to’o deit 66%. Osan ne’ebe la-exekuta hotu, atu reapropria/ roll-over ba iha tinan fiskal 2013 hamutuk 34%.

 

Iha diferente entre saldu tezouru iha exekusaun OJE 2012 hamutuk $443.8 milhõs ho saldu ne’ebe mak Ministeriu Finansas aprezenta iha proposta OJE 2013 ho $409.8 milhões. Perguntas mak ne’e: variasaun hamutuk $34 milhões, osan ne’e ba ne’ebe? Pontus seluk mak, osan husi obrigasoens no kompremisiu hamutuk $168.9 milhoes la-preve iha reorsamenta iha OJE 2013. Ami preokupa, kuandu nia la-rejistu hanesan osan ne’ebe iha konta governu bele irregularidade no defisil atu kontrolla. Tuir lolos saldu governu ne’ebe mak rejistu no ejisti iha proposta OJE 2013 hamutuk $612,787.8 milhõs de dólar.

 

Refere ba iha exekusaun kada ministeriu no orgaun do estadu tomak, kuaze hotu-hotu exekuta orsamentu atinzi 70-90%, maibe fundo Infastruktura hamutuk $875,13 milhões ne’ebe mak nia exekusaun la-to’o metade alokasaun (42%). Projetu fundo infrastruktura hanesan despeza kapital ne’ebe iha relasaun ho povu nia moris, so infrastruktura mak povu bele benefisia dereitamente, tanba osan infrastruktura ne’e mak sei hala’o dezenvolvimentu rural. Iha lista exekusaun infrastruktura, hatudu momos kapasidade governu ne’ebe mukit tebes. Por ezemplu: exekusaun ba projetu dezenvolvimentu urbana no rural atinzi deit 1%, habitasaun ba povu (13%), bee-mos (0%), estrada (9%), edukasaun (7%), etc.

 

Klaru katak, implementasaun orsamentu jeral mak fator importante hodi sukat distribuisaun osan/ rikeza, sukat mos dezenpenhu governu, no ita bele dehan katak situasaun exekusaun ne’ebe fraku, minimiza tiha benefisiu ba povu.

 

Hanesan mos, Luta Hamutuk nia monitoramentu durante ne’e, deskobre relatoriu exekusaun OJE sempre mai ho estetmentu despeza ho numeru deit, nunka iha esplikasaun metas mak atinzi tuir planu anual ministeriu sira, la hatudu indikadoriu no laiha sasukat ba implikasaun ba povu nia moris.

 

Luta Hamutuk propoin ba Parlamentu Nasional, hodi husu ba governu antes debates proposta OJE 2013 tenki aprezenta uluk lai relatoriu exekusaun ho ninia metas mak ministeriu ida-idak atinzi tiha ona tuir planu anual 2012. Hodi nune’e, ita bele hatene no akompanha sasukat ba implikasaun mudansa ne’ebe mak akontese bainhira implementa tinan fiscal 2012 ba povu maioria nia moris diak.

 

 

PONTUS KONSIDERASAUN NO REKOMENDASAUN

1. Tau as nesesidades baziku povu nian iha prioridades

Proposta orsamentu 2013 la hatudu alokasaun ne’ebe mak signifikadu ba iha nesesidades baziku mak povu infrenta dadaun.

 

Iha tinan ida ne’e, aihan karun ba beibeik, povu falta aihan no hamlaha, bee-mos, estrada no eletrisidade hanesan prioridades importante no obrigatoriu hodi rezolve lalais iha tempu badak nia laran. Ita labele husik ona povu atu hein tan, no iha moris at ba beibeik nia laran no infrenta mal-nutrisaun, mal-higienidade no moris kiak iha ninia osan minarai ne’ebe aumenta ba beibeik no konsege besik ona US$11 mil milhões de dólar.

 

Estadu iha reseitas bo’ot no riku, no iha tinan lima ne’e, foti liu RSE 3% husi Fundu Petroliferu, maibe la konsege hadia ninia povu nia moris, problema nia abut nunka rezolve no halerik wain povu husik hanesan kantiga murak ba ukun nain sira.

 

2. Hatu”ur Hikas Dezenvolvimentu Ekonomia

Tuir Konstitusaun RDTL, artigo 138, katak “organizasaun ekonomia Timor-Leste konjuga hamutuk iha forma komunitaria ida ne’ebe iha liberdade no tuir jetaun emprezarial iha setor publiku, setor privadu no setor kooperativas nomos propriedade sosial hanesan meius produsaun.”

 

Relasionadu ho organizasaun ekonomia, ami sujere ba governu, atu funsiona estruktura ekonomia iha setor sira ne’ebe Konstituisaun haruka. Tanba durante ne’e, setor publiku governu entrega tomak ba setor privadu, governu seidauk jere setor publiku hanesan organizasaun ekonomia ida ne’ebe mak bele fo retornu ekonomiku.

 

Nune’e mos meius produsaun saida tuir mandatu Konstituisaun RDTL artigo 138? Ami hare’e katak, setor agrikultura nu’udar meius produsaun ne’ebe reflete 80% povu moris iha areia rural, hanesan to’os nain/ agrikultor. Maibe realidade hatudu ita-nia rai barak mak sei abandonadu, setor ne’e mukit tebes no produsaun tun ba beibeik. Nu’udar setor primaria (livru Proposta OJE 2013, numeru 1, tabela 2.3.2.2.1, p19) hatudu gradualmente tun husi 30.7% iha 2006 ba iha 21.6% iha tinan 2010.

 

Nune’e mos iha Planu Estratejiku Dezenvolvimentu (PED), klaramente hatur ona dezenvolvimentu ekonomia iha 5 pilar importante:

  • Dezenvolvimentu rural. 
  • Agrikultura. 
  • Petroliu. 
  • Turismu. 
  • Investimentu setor privadu.

 Luta Hamutuk hare’e katak, setor sira ne’e mak ita bele halo sasukat ba kresimentu ekonomia, ida ne’e mak fundamentu ekonomia tanba aktividades ekonomia tuir dalan ne’ebe dirizi husi Konstituisaun RDTL no PED rasik.

 

3. Dezenvolvimentu Agrikultura

Iha setor dezenvolvimentu ekonomia agrikula nian ba iha ‘auto-sufisiensia’ nu’udar objetivu PED ne’ebe deskreve iha ninia metas PED no Planu V Governu Konstitusional 2012-2017, ami la-hare’e indikasaun klaru iha Planu Asaun Anual Ministeriu Agrikultura no Peskas (MAP). MAP esplika deit rezultadu kualitativu maibe la-hatudu nia indikador justifika rezultadu kualitativu nian, tuir lolos presiza iha esplikasaun kuantitativu. Por ezemplu, atu sosa batar fini tonaladas 270, maibe la-esplika katak rezultadu atu hetan husi batar fini 270 tonaladas ba kampu produsaun 800 hektares. Hanesan mos fini ba hare, aifarina, modo tahan, etc. Tanba planu anual ne’e iha relasaun ho kresimentu rendimentu povu nian.

 

Hare’e ba kotuk Planu Anual MAP 2012, rezultadu mak saida? Tanba iha 2012, kutivasaun fós ho 3,500 hektares no batar 2,000 hektares. Laiha dadus produsaun ba fós no batar ne’ebe halo kutivasaun tuir planu 2012, produsaun sira ne’e tau ona iha ne’ebe, ninia distribuisaun hanusa; hodi nune’e ita bele sukat produsaun agrikula ninia progressu. Ami hare’e katak, proposta orsamentu ba MAP rasik mos laiha metas ida mak aprezenta. Iha mak livru numeru 1 pajina 19, setor primaria hatudu indikasaun tun ba beibeik. Kuandu dadus aprezenta ho sinismu hanesan ne’e, ami hanoin katak dezenvolvimentu setor agrikultura no peskas hanesan fakar osan deit.

 

4. Investimentu ba Setor Petroliferu-Projetu Tasi Mane

Metas PED ba 2011-2013 konaba Projetu Tasi Mane, primeiru faze plataforma abastesimentu Suai, kontrusaun portu maritima Suai, edifisiu no rehabilitasaun airportu Suai.

 

Iha 2012 governu aloka ona osan hamutuk $123 milhões de dólar maibe la-exekuta, no hasai $70 milhões iha OJE Rectifikativu 2012. Faze primeiru la la’o, maibe tuir Ministru Rekursu Minerais no Mineral (MRMM) katak, faze 2012 so halo estudu no halo aproximasaun ba povu Suai. Perguntas mak ne’e, saida mak sai razaun hodi husu tan osan hodi halo estudu/ konsepsaun Supervizaun ne’ebe ho montante osan hamutuk $17,474 milhões.

 

Investimentu iha Tasi Mane seidauk hatudu ninia retornu ekonomiku iha futuru, ami konsiente katak setor dezenvolvimentu petroliferu defisil tebes hodi sukat ninia retornu iha kurtu prazu, maibe fasil ba ita bainhira komesa konta ninia retornu ekonomiku iha longo prazu, ita labele hasai deit osan nafatin maibe laiha serteza iha futuru, osan hirak mak setor ne’e atu kontribui ba ekonomia rai laran.

 

Luta Hamutuk preokupa tebes konaba kapasidade MRMM ne’ebe minimu tebes iha exekusaun orsamentu. Iha OJE 2012 aloka ona osan ba projetu Tasi Mane maibe la-konsege exekuta, no reapropria tiha ba iha proposta 2013 hamutuk $139.4 milhões ne’ebe hetan aumentu tan $37.9 milhões. Hodi dehan katak, MRMM sei mukit tebes iha exekusaun no implementasaun planu ne’ebe preve ona, kuandu dezenpenhu exekusaun ne’ebe fraku, ami husu ba Parlamentu Nasional atu hare’e didiak despeza ba projetu Tasi Mane no ninia implikasaun ekonomia iha futuru.

 

5. Montante OJE 2013 la reflete kapasidade governu nian

Exekusan tinan 2012 hatudu katak dezenpenhu governu nian sei fraku to’o deit 66%, no laiha razaun atu foti osan barak liu ba iha tinan 2013.

 

 

Hare’e no analize exekusaun aktual 2012 iha fulan Janaeiru 2013, governu  foin mak exekuta aktual osan hamutuk $1,194 mil milhões (66%) husi total orsamentu hamutuk $1,807 mil milhões, ne’ebe governu seidauk exekuta $443.8 milhões (34%). Ho exekusaun ne’ebe fraku hanesan ne’e, proposta OJE 2013 hamutuk $1,797.5 mil milhões la-reflete kapasidade governu nian.

 

Luta Hamutuk hakarak hateten katak, OJE 2013 bo’ot nafatin signifika atu rezolve buat bo’ot ne’ebe povu infrenta, maibe presiza reorganiza no disiplina ministeriu sira hotu nune’e bele implementa projetu estratejiku sira, servisu tenki sinerjia no integradu ho ministeriu seluk atu bele atinzi metas estadu. Presiza mos iha mekanismu koordenasaun ne’ebe adekuadu, koopera ho autoridades lokal iha prosesu kontrollu, loke dalan hodi bele asesu dokumentus kontratu sira no ministru sira tenki tuir duni orientasaun Chefe Governu nian hodi maximiza benefisiu dezenvolvimentu ba povu maioria.

 

Obrigadu wain.

Dili: 18 Janeiru 2013

 

MERICIO AKARA

Director Luta Hamutuk

Tel: (+670) 77263783